चुनाव आ गइल का हो
नेता बारन लउकत
चमचा बारन फउँकत
भोटर बारन छउकत

चुनाव आ गइल का हो

सबका मुँहे जात बा
लमा लमा बात बा
पुरनके हालात बा

चुनाव आ गइल का हो

झंडन के रेल बा
पोस्टर के खेल बा
भोटर में ना मेल बा

चुनाव आ गइल का हो

बँटात बाटे पाउच
मचल बा डोमघाउच
लोकतंत्र करे उह आउच

चुनाव आ गइल का हो

शिलान्यास पर जोर बा
चारों ओरी शोर बा
लोकतंत्र के इहे भोर बा

चुनाव आ गइल का हो

सपना बेचात बा
विकास तउलात बा
भोटर बउरात बा

चुनाव आ गइल का हो

बखोर सब चहेटाई
नीमन लोग चुनाई
हम इहे गोहराईं
चुनाव आ गइल का हो

LEAVE A REPLY

Please enter your comment!
Please enter your name here